«Шоҳнома» — Ўрта Осиё ва Эрон халқларининг миллий ифтихори ўсиб келаётган даврда яратилди. Ушбу асарни кўп шоир ва адабиётшунослар бадиий фикр хазинаси, янги- янги бадиий асарларнинг вужудга келишида уммондек тубсиз манба деб ҳисоблайдилар. Мазкур достон мукаммал тартибга солинган бўлиб, композицияси ҳам жуда пухта. Фирдавсий ўзининг бу улкан асарида жуда кўп фалсафий ғоялар, ижтимоий масалаларни илгари суради, ажойиб характерларни яратади, пейзажлар чизади. Жанг саҳналарини тасвирлайди. Асар кенг китобхон оммага мўлжалланган.
